ຮອງນາຍົກ ຊີ້ນຳການຂຸດຄົ້ນໄມ້ຢູ່ແຂວງເຊກອງ ຕ້ອງເຂັ້ມງວດຕາມນະໂຍບາຍຂອງລັດຖະບານ
Vientianemai – 09-05-2012
ຮອງນາຍົກລັດຖະມົນຕີ ໄດ້ເນັ້ນໃຫ້ແຂວງເຊກອງ ຖືສຳຄັນການຄຸ້ມຄອງຂຸດຄົ້ນໄມ້ເຂດອ່າງເກັບນ້ຳເຂື່ອນໄຟຟ້າເຊ ກອງ 4 ແລະ ເຂດສຳປະທານບໍ່ຖ່ານຫີນຢູ່ແຂວງຂອງຕົນ ເພື່ອເຂັ້ມງວດຕໍ່ການປະຕິບັດນະໂຍບາຍຂອງລັດຖະບານ ທີ່ເນັ້ນໃຫ້ການຂຸດຄົ້ນໄມ້ແຕ່ບ່ອນທີ່ມີໂຄງການ ເປັນຕົ້ນໂຄງການເຂື່ອນໄຟຟ້ານ້ຳຕົກ ທະລຸເສັ້ນທາງຂຸດຄົ້ນແຮ່ທາດ ຊົນລະປະທານ ແລະ ໂຄງການອື່ນໆທີ່ນຳຜົນປະໂຫຍດມາສູ່ປະຊາຊົນເທົ່ານັ້ນ.
ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ໄດ້ເນັ້ນໃຫ້ຄະນະພັກ ອຳນາດການປົກຄອງແຂວງ ແລະ ຂະແໜງການກ່ຽວຂ້ອງຈາກສູນກາງ ແຂວງ ເມືອງ ໃນໂອກາດຢ້ຽມຢາມແຂວງເຊກອງ ໃນວັນທີ 7 ພຶດສະພານີ້ວ່າ: ຕ້ອງປະສານງານກັນໃຫ້ລະອຽດຈະແຈ້ງ ແລ້ວພ້ອມກັນຈັດຕັ້ງປະຕິບັດໂຄງການດັ່ງກ່າວໃຫ້ສຳເລັດຕາມ ກຳນົດເວລາ ພ້ອມໆກັບການສຳຫຼວດຍົກຍ້າຍປະຊາຊົນ 42 ບ້ານ ອອກຈາກເຂດສ່ຽງຕໍ່ນ້ຳຖ້ວມໃນເຂດໂຄງການກໍ່ສ້າງເຂື່ອນໄຟຟ້າເຊ ກອງ 4 ເຊິ່ງການຂຸດຄົ້ນໄມ້ນັ້ນຕ້ອງປະຕິບັດຢ່າງເຂັ້ມງວດ ຕາມນະໂຍບາຍຂອງລັດຖະບານລາວ ທີ່ອະນຸມັດໃຫ້ຂຸດຄົ້ນຢູ່ບ່ອນທີ່ໂຄງການກໍ່ສ້າງເຂື່ອນໄຟຟ້າ ນ້ຳຕົກ ການທະລຸເສັ້ນທາງການຂຸດຄົ້ນແຮ່ທາດ ການກໍ່ສ້າງຊົນລະປະທານ ແລະ ໂຄງການອື່ນໆ ທີ່ນຳຜົນປະໂຫຍດມາສູ່ປະຊາຊົນເທົ່ານັ້ນ.
ແນວໃດກໍດີ ທ່ານ ລ້ຽງ ຄຳພູນ ຮອງເຈົ້າແຂວງເຊກອງ ຮອງປະທານຄະນະກຳມະການຄຸ້ມຄອງໂຄງການກ່າວລາຍງານວ່າ: ຫຼັງຄະນະຮັບຜິດຊອບພາກສະໜາມແຂວງຕົນ ໄດ້ປະສານສົມທົບກັບບໍລິສັດ ກົມປ່າໄມ້ (ກອງສຳຫຼວດ ແລະ ວາງແຜນປ່າໄມ້) ລົງສຳຫຼວດຕັດແລວ ເພື່ອກຳນົດເຂດລະດັບນ້ຳຖ້ວມ 290 ລົງມາ ແລະ ສຳຫຼວດກຳນົດຂອບເຂດຂຸດຄົ້ນໄມ້ຢູ່ເຂດສຳປະທານຂຸດຄົ້ນບໍ່ຖ່ານ ຫີນແລ້ວ ບໍລິສັດກໍໄດ້ລົງມືຈັດຕັ້ງປະຕິບັດ ເຊິ່ງມາຮອດປັດຈຸບັນ ສາມາດຂຸດຄົ້ນຂຶ້ນບັນຊີ ແລະ ຊື້ຂາຍແລ້ວ 57 ບັນຊີ 12.065 ທ່ອນ ໂດຍມີບໍລິມາດ 25.097.220 ແມັດກ້ອນ ເປັນເງິນ 1.539.340 ກ່ວາໂດລາສະຫະລັດ ໃນນີ້ຢູ່ເຂດອ່າງເກັບນຳເຂື່ອນໄຟຟ້າເຊກອງ 4 ມີ 35 ບັນຊີ 9.218 ທ່ອນ ບໍລິມາດ 17.973.480 ແມັດກ້ອນ ເປັນເງິນ 1.188.863 ກ່ວາໂດລາສະຫະລັດ ແລະ ເຂດສຳປະທານຂຸດຄົ້ນຖ່ານຫີນ 22 ບັນຊີ 2.847 ທ່ອນ ບໍລິມາດ 7.120.740 ແມັດກ້ອນ ເປັນເງິນ 350.477 ກ່ວາໂດລາສະຫະລັດ.